குங்குமப்பூ பற்றிய சுவாரசியமான விடயங்கள் (Saffron)

குங்குமப்பூ (Saffron) ‘சிவப்பு தங்கம்‘ என்னும் பெயரில் அழைக்கபடுகிறது. குங்குமப்பூ உலகிலேயே மிகவும் மதிப்பு வாய்ந்த மசாலாப் பொருளாக உள்ளது. பொலிவான சரும அழகைத் தரும் குங்குமப்பூ, பொதுவாக நிறத்திற்காக சேர்க்கப்படுகிறது.

குங்குமப்பூ உணவு பதார்த்தங்கள், அழகு சாதன பொருட்கள் தயாரிப்பு போன்றவற்றில் பயன்படுகிறது. குங்குமப்பூவில் எண்ணற்ற நன்மைகள் அடங்கியுள்ளன.

ஏனெனில் குங்குமப்பூ (Saffron) அழகு, உணவு பொருட்களில் பயன்படுவதோடு மட்டுமல்லாமல், உடல் நல பிரச்சனைகளான மன இறுக்கம், மன அழுத்தம், பார்வை கோளாறு மற்றும் ஞாபக சக்தி போன்றவற்றை சரி செய்யவும் பயன்படுகிறது.

குங்குமப்பூ பற்றிய சுவாரசியமான தகவல்கள் (Saffron)

குங்குமப்பூ ‘க்ரோகஸ் சட்டிவஸ்’ என்று அழைக்கப்படும் மலரிலிருந்து கிடைக்கிறது. குங்குமப்பூ க்ரோகிஸ் பூக்களின் உலர்ந்த ஆரஞ்சு மற்றும் சிவப்பு  சூலகமுடி ஆகும்.

இச்செடியானது மத்தியதரைக் பகுதிகளில் தோன்றியதாக நம்பப்படுகிறது. உலகின் 94 சதவீத குங்குமப்பூ (Saffron)உற்பத்தி இரான் வசம் உள்ளது.

இந்தியாவில், ஜம்மு & காஷ்மீர் மற்றும் இமாச்சலப் பிரதேசங்களில் குங்குமப்பூ (Saffron) பயிரிடப்படுகிறது. அதைத்தவிர ஸ்பெயின், கிரீஸ் போன்ற நாடுகளிளும் அதிகம் விளைகிறது. உலகளவில் ஸ்பெயின் நாட்டு குங்குமப்பூவிற்கு அதிக வரவேற்பு உள்ளது.

குங்குமப்பூவின் மலரிலிருக்கும் மகரந்தத்தை தான் நாம் சாப்பிட்டு கொண்டிருக்கிறோம். இரண்டு இலட்சம் மலர்களில் இருந்து 1 கிலோ குங்குமப்பூ தான் தயாரிக்க முடியும். தரமான குங்குமப்பூ தயாரிக்க அதிக நேரம் மற்றும் காலம் தேவைப்படும்.

அதனால் தான் இதன் விலையும் மிக அதிகம். இதனால் தான் உலகத்தில் விலையுயர்ந்த மசாலா பொருளாக குங்குமப்பூ இருக்கிறது.

பண்டைய காலம் முதலே குங்குமப்பூவிற்கு அதிகமான தேவை இருந்து வருகிறது. குங்குமப்பூவில் பல வகைகள் உள்ளது. அவற்றில் முக்கியமான வகைகள் பத்மகாதி, பராசிகா, மதுகந்தி, பாதிகா, சர்கோல்.

குங்குமப்பூ, அதன் விலை அதிகமாக இருந்தபோதிலும், அதன் ஆக்ஸிஜனேற்ற குணங்களுக்காக அதற்கு அதிகத்தேவை உள்ளது. குரோகஸ் பூக்களை நூல் போன்ற நறுமணப்பொருளாக மாற்றும் செயல்முறை கடினமானது மற்றும் அதிக வேலை மிகுந்ததாக இருப்பதால், இது மிகப்பெரிய விலையை கொண்டுள்ளது:

ஒரு கிலோ குங்குமப்பூவை விளைவிக்க சுமார் 1,60,000 பூக்கள் தேவை.குங்குமப்பூ சாகுபடிக்கு கடின உழைப்பு மற்றும் மிகவும் பொறுமை அவசியம்.

இலையுதிர்காலத்தில் அறுவடை தயாராகும் போது, பூக்கள் பறிக்கப்பட்டு, சூல் அகற்றப்பட்டு சிவப்பு நிறம் போகச்செய்து, மெல்லிய நூலின் அளவிற்கு சுருங்கும் வரை நாட்கள் உலர்த்தப்படும். குங்குமப்பூவின் சூல் சுமார் 2 மி.கிராம் எடை கொண்டது.சராசரியாக ஒவ்வொரு பூவிலும் மூன்று சூல்கள் இருக்கும்.

குங்குமப்பூ 90 க்கும் மேற்பட்ட நோய்களை குணப்படுத்துகிறது. குங்குமப்பூவில் உள்ள ஆக்சிடன்ட்களும், கரோட்டினும் அதிக நன்மைகளை தரக்கூடியது.

இதில் உள்ள விற்றமின் சி மற்றும் மங்கனீசு சத்துக்கள் எலும்புகளை பலப்படுத்தவும், திசுக்களை சரிசெய்யவும், செக்ஸ் ஹார்மோன்களை தூண்டவும் பயன்படுகிறது.

குங்குமப்பூவின் ஆரோக்கிய நன்மைகள்( Medicinal value of Saffron)

சரும பொலிவு கூடும்

பாலுடன் குங்குமப் பூவை சேர்த்து தினமும் சாப்பிட்டு வந்தால் தேக ஆரோக்கியம் மற்றும் சரும பொலிவு கூடும். முகம் பிரகாசமடையும்.

நல்ல தூக்கத்தை கொடுக்கும்

குங்குமப்பூவில் சப்ரனால் என்னும் பொருள் உள்ளது. இது ஒரு மயக்க மருந்து போல் செயல்படுகிறது. மேலும் குங்குமப்பூவில் ஆன்டிசெப்டிக் தன்மை உள்ளது. இது நரம்பு மண்டலத்தை இறுக்கத்திலிருந்து தளர்த்துகிறது. இது

இயற்கையான நிம்மதியான தூக்கத்தை கொடுக்கிறது.

கர்ப்பிணிகளுக்கு  ஏன் ஏற்றது

கர்ப்பிணி பெண்கள் குங்குமப்பூ கலந்த பாலை குடிப்பதன் மூலம் குழந்தைகளின் வளர்ச்சி எவ்வித குறையும் இல்லாமல் முழுமையடையும். கருவுற்ற பெண்களுக்கு மூன்றாம் மாதத்திலுருந்து பாலில் காய்ந்த குங்குமப்பூவை கலந்து கொடுத்து வந்தால், சிசுவிற்கும், தாய்க்கும் நோய் எதிர்ப்பு சக்தி கூடும்.

குங்குமப்பூ சாப்பிட்டால் குழந்தையின் நிறம் கூடும் என்பதெல்லாம் கட்டுக்கதை. மசக்கையாக இருக்கும்போது பெண்களுக்கு எதை சாப்பிடாலும் வாந்தி உணர்வு தோன்றும். குங்குமபூவில் உள்ள வேதிப்பொருள் அந்த வாந்தி உணர்வை கட்டுப்படுத்தும்.

அதற்கு தான் குங்குமப்பூ கலந்த பாலை கொடுக்கிறார்கள். கர்ப்பிணி மட்டுமல்லாமல் மற்றவர்களும் இதனை தாராளமாக குடிக்கலாம்.

முகம் ஜொலிக்கும்

குங்குமப்பூ தைலம் சில சொட்டுக்கள் எடுத்து, முகத்தில் தடவி மசாஜ் போல செய்து அரை மணி நேரம் ஊறவைத்து வெதுவெதுப்பான நீரில் கழுவினால் முகத்தில் ரத்த ஓட்டம் அதிகரித்து முகம் பொலிவு பெறும்.

மன உளைச்சல், மன இறுக்கம் நீங்கும்

மன உளைச்சல், மனச் சோர்வு உள்ளவர்கள் குங்குமப் பூவினை எடுத்துக் கொள்ளும்போது செரடோனின் என்ற பொருள் உடலில் சுரக்கிறது. வயது முதிர்வினால் ஏற்படும் கண் பார்வை பாதிப்பு குங்குமப்பூ எடுத்துக் கொள்வதன் மூலம் குறைகிறது. பாதிக்கப்பட்ட திசுக்களை புதுப்பிக்கவும் குங்குமப் பூ உதவுகின்றது.

இதய செயல்பாடு மேம்படுகிறது

குங்குமப்பூவில் உள்ள கேமம்ஃபிரோல் என்னும் இதயத்தை பாதுகாக்கும் மூலக்கூறு, இதயத்தின் உந்து சக்தியை அதிகரிக்கிறது. இது இதய செயல்பாட்டை மேம்படுத்துகிறது.

புற்றுநோயைத் தடுக்கிறது

குங்குமப்பூவில் உள்ள ஆன்டிஆக்சிடெண்ட்கள் உடலுக்கு தீங்கு விளைவிக்கும் ப்ரீ ராடிக்கல்ஸ்களை சமநிலை செய்ய உதவுகிறது. இந்த புற்றுநோய் போன்ற நாட்பட்ட நோய்கள் வராமல் தடுக்கிறது.

சுவாச பிரச்சனைகள் தீரும்

குங்குமப்பூ ஆஸ்துமா நோயாளிகளின் நுரையீரலில் உள்ள திசுக்களின் வீக்கத்தினை குறைத்து ரத்த நாளங்களை சீராக செயல்பட வைக்கிறது. இதனால் காற்றுக் குழாய்கள் சீராக இயங்குகின்றன.

ஆன்டிஆக்சிடெண்ட் நிறைந்தது

குங்கும்ப்பூவில் ஆன்டிஆக்சிடெண்ட் நிறைந்து காணப்படுகிறது. க்ரோசின், க்ரோசிட்டின், சபிரனால் , கேம்ஃபிரோல் போன்ற வேதி பொருள்கள் குங்குமப்பூவில் உள்ளன. இவை மனநலம், உணவு, உடல் ஆரோக்கியம் போன்ற ஆரோக்கிய நன்மைகளைக் கொண்டுள்ளன.

மூட்டுகள் பலமாகும்

மூட்டு வலி உடையோர் குங்குமப் பூ எடுத்துக் கொள்வதன் மூலம் மூட்டு சதை வீக்கங்கள் குறைகின்றது. மூட்டு பலவீனம் நீங்கி, மூட்டுகள் பலமாகிறது.

நல்ல குங்குமப்பூவை எவ்வாறு கண்டறிவது

நீங்கள் வாங்கிய குங்குமப் பூ சுத்தமானது என்பதை கண்டறிய குங்கமப்பூவின் ஓரிரு இதழ்களை தண்ணீரில் போட்டால் உடனே தண்ணீர் சிவப்பு நிறமானால் அது போலியானது. 10 அல்லது 15 நிமிடங்களில் கழித்து நிறம் மாறி நல்ல மணமும் வந்தால் அதுவே உண்மையான குங்குமப் பூ என்பதை கண்டறியலாம்.

குங்குமப்பூ 80 சதவீதம் சிவப்பாகவும் 20 சதவீதம் மஞ்சளாகவும் இருக்கும். தரமற்றது எனில் 20 சதவீதம் மட்டுமே சிவப்பாக இருக்கும்.

விலைக்குறைவாக குங்குமப்பூ விற்கும் வியாபாரிகள் குங்குமப்பூவுடன் தேங்காய் துருவல் மற்றும் மெல்லிய நூலிற்கு சாயம் பூசி கலந்துவிடுவார்கள். இது பார்க்கும் போது வித்தியாசம் தெரியாது. ஆனால் உண்ணும் போது வலிப்பு போன்ற பக்கவிளைவுகள் ஏற்படுத்தும் வாய்ப்பு அதிகம்.

எனவே விலை குறைவாக கிடைக்கிறதே என்று தரமற்ற குங்குமப்பூவை வாங்கி பயன்படுத்தாதீர்கள்.

குங்குமப்பூ உயர்ந்த உணவுகளில் மசாலாவோடு சேர்த்து சுவையூட்டும் முகவராக பயன்படுத்தப்படுகிறது.

குங்குமப்பூ பொதுவாக இரண்டு முதல் நான்கு ஆண்டுகளில் அதன் சுவையையும் ஆற்றலையும் இழக்கும் என்பதால் கவனித்து வாங்கவேண்டும். அதோடு தரமானதா என்பதை பரிசோதித்து வாங்க வேண்டும்.

 

​குங்குமப்பூவின் பயன்பாடுகள்

குங்குமப்பூவை வாய்வழியாக எடுத்து கொள்வதும் உண்டு. இது அல்சைமர் நோய்க்கு உதவக்கூடும் என்று சில ஆய்வுகள் காட்டுகின்றது மன அழுத்தத்துக்கும் உதவுவதாக ஆய்வுகள் சொல்கிறது.

குங்குமப்பூ ஆஸ்துமா, இருமல், தொண்டைப்புண், கக்குவான் இருமல் போன்றவற்றுக்காக பயன்படுத்தப்படுகிறது.

பாலியல் ஆர்வத்தை ஊக்குவிக்கவும் இதை பயன்படுத்தி வருகிறார்கள். மாதவிடாய் அசெளகரியம், மனச்சோர்வு போன்ற அறிகுறிகளையும் இவை குறைத்து விடுகிறது.

மூளை ஆரோக்கியம், வயிற்றுப்புண், புற்றுநோய் பாதிப்பை தடுக்கவும் குறைக்கவும் பயன்படுத்தப்படுகிறது. உணவில் மசாலாவிலும் உணவுக்கு நிறமளிக்கவும் சுவையூட்டவும் இது பயன்படுத்தப்படுகிறது.

குங்குமப்பூவில் பல்வேறு அத்தியாவசிய தாதுக்கள் மற்றும் வைட்டமின்கள் நிரம்பியுள்ளது. கல்சியம், பொட்டாசியம், மெக்னீசியம், பாஸ்பரஸ் மற்றூம் இரும்பு போன்றவை நிறைந்துள்ளது.
இதில் விற்றமின்கள் ஏ, பி 1, பி 2 ,பி 9, விற்றமின் சி போன்றவை உள்ளது.
  க்ரோசின், க்ரோசிடின்,ஆஃப்ரானால் போன்ற வேதியியல் பொருள்கள் இதில்உள்ளது. இவை தான் அதன் சுவைக்கும் வாசனைக்கும் நிறத்துக்கும் காரணம்.
குங்குமப்பூ இலேசான கசப்பு தன்மை கொண்டது.அப்படியே பாலில் சில இழைகளை போட்டு பயன்படுத்தலாம். அல்லது அதை உணவில் சேர்க்க விரும்பினால் சர்க்கரை கொண்டு அரைத்து சேர்க்கலாம். எப்படி பயன்படுத்தினாலும் அளவை குறைத்து பயன்படுத்த வேண்டும்.

நன்மை செய்யும் குங்குமப்பூ பக்கவிளைவுகளை உண்டாக்குமா?

நாள் ஒன்றுக்கு 1.5 கிராமுக்கும் குறைவாகவே எடுத்துகொள்ள வேண்டும். இது பாதுகாப்பானது. அதிகமாக எடுத்துகொள்வது நச்சுத்தன்மையை உண்டாக்கும்.
அதேநேரம் ஒவ்வாமை இருப்பவர்கள் 1 கிராம் அளவு எடுத்துகொண்டாலுமே பாதிப்பை பெறுவதற்கான வாய்ப்பு உள்ளது. தாவர ஒவ்வாமை கொண்டவர்களுக்கு குங்குமப்பூ ஒவ்வாமை ஏற்பட அதிக வாய்ப்புண்டு. 
மூக்கடைப்பு, சுவாசத்தில் சிரமம், குமட்டல் மற்றும் பதட்டம் போன்ற பக்க விளைவுகளை கொண்டிருப்பவர்கள் இதை தவிர்ப்பது நல்லது.
கொடுக்கப்பட்ட அளவை காட்டிலும் அதிகமாக எடுத்துகொள்ளும் போது அது தலைவலி, பசியின்மை, பலவீனம் ஏற்படும். மற்றும் தீவிர நிகழ்வுகளில் நுரையீரல் மற்றும் சிறுநீரகங்களை பாதிப்புக்குள்ளாக்கும்.
கர்ப்பம் தரித்த முதல் 20 வாரங்கள் வரை குங்குமப்பூவை தவிர்க்க வேண்டும். ஏனெனில் இது கருச்சிதைவு உண்டாக்கிவிட வாய்ப்புள்ளது. கர்ப்பத்தின் இறுதி காலத்தில்  மருத்துவரின் ஆலோசனையோடு அளவாக எடுத்துகொள்ளலாம்.
அதே போன்று தாய்ப்பால் கொடுக்கும் காலங்களில் குங்குமப்பூவை தவிர்க்க வேண்டும்.
குங்குமப்பூ தினசரி அளவை காட்டிலும் அதிகமாக எடுக்கும் போது அது இரத்த அழுத்தத்தை குறைக்க கூடும் என்று சொல்லப்படுகிறது. அதிலும் நீண்ட காலத்திற்கு பயன்படுத்துவது ஆபத்தானது.
இரத்த அழுத்தம் குறைவாக இருப்பவர்கள் குங்குமப்பூவை எடுத்துகொள்ளும் போது அது மேலும் பாதிப்பை உண்டாக்கலாம்.
குங்குமப்பூ இதயத்துடிப்பின் வேகத்தை வலிமையை பாதிக்க செய்யலாம். அதிக அளவு குங்குமப்பூ எடுத்துகொள்வது சமயங்களில் மோசமான இதய பாதிப்பை உண்டாக்கும்.

Leave a Reply

Your email address will not be published.